३० साउन, काठमाडौं । प्रधानमन्त्री र मन्त्री हुँदा पनि दौरासुरुवाल टोपी नलगाउने माओवादी परम्परालाई नवनियुक्त सञ्चार मन्त्री राम कार्कीले चुनौति दिएका छन् । पहिलोपटक मन्त्री बनेका कार्कीले आइतवार राष्ट्रपतिसमक्ष पद तथा गोपनीयताको सपथ खाँदा दौरासुरुवाल, ढाकाको इस्कोट र ढाकाकै टोपी लगाएका थिए ।
पहिलोपटक ०६३ सालमा गिरिजाप्रसाद कोइराला नेतृत्वको अन्तरिम सरकारमा सहभागी हुँदासमेत हिसाब गर्दा योसहित माओवादी पार्टी छैटौंपटक सरकारमा पुगेको छ । यसबीचमा माओवादीका दुई नेताले तीनपटक प्रधानमन्त्री बन्नेसम्मको अवसर पाएका छन् ।
तर, प्रचण्ड र बाबुराम भट्टराईले प्रधानमन्त्री हुँदा पनि दौरासुरुवाल लगाउन रुचाएनन् । प्रचण्ड र बाबुरामलाई पछ्याउँदै माओवादीबाट मन्त्री हुने पुरुषहरुले पनि सर्ट पाइन्ट कोट र कालो भादगाउँले टोपी लगाउने गरेका छन् ।
मन्त्री भएकै बेला खस क्षेत्रीहरुको अभियानमा साथ दिँदा केही समय दौरासुरुवाल टोपी लगाएका टोपबहादुर रायमाझीले सपथ ग्रहण र अघिपछि भने सर्ट पाइन्ट कोट नै लगाउने गरेका थिए । उनी बाहेक अरु मन्त्रीले कहिल्यै दौरासुरुवाल लगाएका थिएनन् ।
माओवादीको दौरा सुरुवालविरोधी परम्परालाई तोड्ने राम कार्की पहिलो माओवादी नेता भने होइनन् । यसअघि उपराष्ट्रपति निर्वाचित भएपछि नन्दवहादुर पुनले पनि सपथ्रहणका बेला शुरु गरेको दौरा सुरुवाललाई औपचारिक कार्यक्रमहरुमा निरन्तरता दिँदै आएका छन् ।
पुन संवैधानिक पदमा पुगेर दौरा सुरुवाल लगाउने पहिलो माओवादी बने भने मन्त्री बनेर दौरासुरुवाल लगाउने पहिलो माओवादी बनेका छन् कार्की ।
सपथग्रहण पछि कार्की दौरा सुरुवालमै सञ्चार मन्त्रालय पुगेका थिए । उनले दौरा सुरुवाल लगाउनुको कारणबारे अनलाइनखबरसँग भने-‘दौरासुरुवाल नेपालको ठूलो जनसंख्याले लगाउँछ । यो विशिष्ठ पोशाकमध्ये एक हो । कतिपय मान्छेले धोती लगाउछन् भने हामी जुन ठाउँबाट आएका छौं, हामीले दौरा सुरुवाल किन नलगाउने ? यो एउटा ‘कल्चर’को निरन्तरता पनि हो ।’
माओवादी मन्त्रीले भने- हामीले दौरासुरुवाल किन नलाउने ?
0 comments:
Post a Comment