२८ असार, काठमाडौं । प्रधानमन्त्री केपी शर्मा ओलीले आइतबार साँझ बालुवाटारमा सत्तारुढ दलहरुको बैठक डाकेका थिए । सो बैठकमा उपप्रधानमन्त्री कमल थापाले एउटा नयाँ कुराको खुलासा गरेका थिए । त्यो खुलासा थियो, प्रधानमन्त्री केपी ओली र नेकपा एमालेका नेताहरु नै माओवादीलाई धकेलेर सरकारभन्दा बाहिर पुर्याउन चाहन्छन् ।
माओवादीलाई धकेलेर सरकार बाहिर पुर्याउने र प्रतिपक्षमा बसेर चुनावमा जाने एमालेको दाऊ रहेको राप्रपा नेपालका अध्यक्ष थापाले प्रष्ट संकेत गरेका थिए ।
‘यसो गर्दा तपाईहरुलाई भोट त बढ्ला, तर देशको अवस्था नै बिगि्रयो भने एमालेको मात्रै भोट बढेर मुलुकलाई के फाइदा ?’ बालुवाटार बैठकमा थापाको भनाइ थियो,’त्यसैले प्रधानमन्त्री र प्रचण्डजीले आसपमा समझदारी गर्नुहोस्, अहिलेको गठबन्धनलाई टुटाउनु हुँदैन ।’
बैठकमा थापाले एमालेका नेताहरुलाई संकेत गर्दै भनेका थिए- ‘मलाई थाहा छ, तपाईहरु के सोचिरहनुभएको छ ।’
एमाले नेताहरुले माओवादीलाई उत्तेजित गराएर सरकारबाट बाहिर पठाउन खोजिरहेको थापाको आरोप थियो ।
बालुवाटार बैठकमा कमल थापालेजस्तै विजयकुमार गच्छदारले पनि प्रचण्ड र केपी ओलीलाई मिल्न आग्रह गरेका थिए । ओलीले पनि ९ बुँदे समझदारी कार्यान्वयन गर्ने र कांग्रेसलाई पनि सरकारमा ल्याउनेबारे पहल गर्नुपर्ने गच्छदारको सल्लाह थियो ।
तर, सोही बैठकमा प्रधानमन्त्री केपी ओली माओवादीसँग नरम हुनुभन्दा पनि चर्कोरुपमा प्रस्तुत भएका थिए । बैठकको अन्त्यमा ओलीले ‘ओनसरीको च्याम्बर’मा बसेर ७ बुँदे बनाएको र कांग्रेससँग साँठगाँठ गरेको आरोप माओवादीसमक्ष लगाएका थिए ।
कांग्रेससँग मिलेर मलाई थर्काउने ? भन्दै ओलीले आफूलाई सत्तामा बसिरहने रहर नभएको बताइरहँदा केही नेताहरुले ओलीलाई नरम हुन सम्झाइबुझाइ गरेका थिए ।
सोमबार साँझ जब ओली कडिकए
राष्ट्रिय सहमतिको कुरो लिएर माओवादी अध्यक्ष प्रचण्ड सोमबार साँझ बालुवाटार छिरे । त्यहाँ ओली र प्रचण्डवीच झण्डै अढाइ घण्टा कुराकानी भयो । तर, सो भेटमा केपी ओलीले अति नै रुखो कुरा गरेको प्रचण्डले आफ्ना नेताहरुलाई रिपोटिङ गरेका छन् ।
‘ओलीले म ९ बुँदे पनि कार्यान्वयन गर्दिँन, ३ बुँदे भद्र सहमति पनि कार्यान्वयन गर्दिँन,’ ओलीले प्रचण्डसमक्ष दिएको अभिव्यक्ति उधृत गर्दै स्रोतले भन्यो-‘म यस्तो सम्झौता गरेर आफ्नो राजनीतिक छवि बिगार्न चाहन्न, बरु सरकारबाट हट्नुपरे पनि तयार छु ।’
किचकिच सहनुभन्दा सरकार छाड्ने बेस
यसैवीच केपी ओलीनिकट एमाले नेताहरुको अनौपचारिक बैठकले सरकारमा बसिरहेर भन्दा सरकार बाहिर रहेर चुनावमा जाँदा पार्टीलाई धेरै भोट आउने निश्कर्ष निकालेको थियो । त्यसैले कुनै पनि बाहनामा सरकार ढालेको दोष माओवादीलाई जाने गरी एमाले सरकारबाट बाहिरिन इच्छुक थियो ।
आफ्नो ९ महिने कार्यकालमा केपी ओलीले राष्ट्रवादी छवि बनाएको र मधेसको आन्दोलनलाई मथ्थर पारेर पार्टीलाई बलियो बनाएको निश्कर्षसहित एमाले नेताहरु सरकारबाट बाहिरिएर चुनावमा इच्छुक देखिएको स्रोतको दाबी छ ।
सरकारबाट जतिसक्दो छिटो बाहिर निस्कने योजना अनुरुप ओली सरकारले माओवादी, मधेसी वा छिमेकीसँग नझुक्ने निर्णय लिएको एमाले निकटस्थहरुको विश्लेषण छ ।
ओली नेतृत्वको ९ महिने सरकार सफल र प्रधावकारी रहेको एमाले नेताहरुको निश्कर्ष छ । त्यसैले उनीहरुको चाहना थियो, माओवादीको किचकिच सुनेर बसिरहनुभन्दा सरकार छाड्नु बेस । अन्ततः केपी ओली प्रचण्डलाई चिढ्याएर सरकारबाट बाहिर धकेल्न सफल भइछाडे ।
झट्ट हेर्दा सरकार ढाल्नमा माओवादी निमित्त कारक बने पनि यसभित्र एमाले नेताहरु र स्वयं प्रधानमन्त्री ओलीको चाहनासमेत लुकेको आइतबार बालुवाटारमा कमल थापाले गरेको खुलासाबाटै प्रस्ट हुन्छ ।
निश्चित छ, अब सरकार ढालेको र राजनीतिक अस्थिरता निम्त्याएको आरोपको सामना माओवादीले गर्नुपर्ने छ भने केपी ओली यो अपजसबाट पूरै जोगिने सम्भावना छ ।
केपी ओलीको चाहनाः माओवादी बाहिरिओस् !
0 comments:
Post a Comment